රට පුරා රෝද පුටු චාරිකා – කොළඹ මෙලනි මානෙල් , කුරුණෑගල චාන්දනී දිසානායක , හා මහනුවර වාර්තාකරු

මාර්තු 01 දා ට යෙදුණු ජත්‍යන්තර රෝද පුටු දිනය නිමිත්තෙන්, ප්‍රථම වතාවට ශ්‍රි ලංකාවෙි දී ආබාධ සහිත පුද්ගල සංවිධාන එකමුතුව මගින් අද :02 දා දිස්ත්‍රික්ක 06 යක දී රෝද පාද චාරිකා නමින් ජත්‍යන්තර රෝද පුටු දිනය සමරනු ලැබිණි.

මාතර, කොළඹ, මහනුවර, කුරුණෑගල, පුත්තලම සහ මොණරාගල යන දිස්ත්‍රික වල දී අද පෙරවරුවේ එක ම වේලාවට රෝදපාද චාරිකාව සිදුකෙරිණි.

මහනුවර බෝගම්බර ක්‍රීඩාංගණය අභියසින් රෝද පුටුවල නැගුණු ආබාධ සහිත පුද්ගලයින් දළදා වීදියලකොටුගොඩැල්ල වීදිය ඔස්සේ ගමන් ගෙන මහනුවර දිස්ත්‍රික් ලේකම් කාර්යාලය වෙත පැමිණියහ.

එහිදී අයිතීන් උදෙසා අපි සංවිධානයේ සභාපති නිශා ෂරීෆ් මෙණවිය විසින් මධ්‍යම පළාත් ආණ්ඩුකාර නීතීඥ ලලිත් යූ ගමගේ මහතාට සංදේශයක් බාර දෙමින් රෝද පුටුවේ ප්‍රවේශ අයිතිය තහවුරු කරන ලෙස ඉල්ලීමක් කරනු ලැබුවාය.
ආබාධ සහිත පුද්ගලයින්ගේ අයිතිවාසිකම් පිළිබඳ ජනතා අවධානය යොමු කිරීම සඳහා අදාළ වැඩපිළිවෙළ දියත් කළ බවත් රෝද පුටුවක් මත සිටින්නේ මූලික අයිතිවාසිකම් හිමි තවත් පුද්ගලයෙකු බව සැවොම තේරුම් ගත යුතුව තිබෙන බවත් නිශා ෂරීෆ් මෙණවිය කීවාය.
රෝද පුටු භාවිත කරන අයට පොදු ස්ථාන වලට ප්‍රවේශ වීම සඳහා අවශ්‍යය පහසුකම් සැලසීම පිළිබඳව මේවන විටත් අවධානය යොමුව තිබෙන බවත් අලුතින් ගොඩනැගිලි ඉදිකිරීමේදී ආබාධ සහිත පුද්ගලයින්ට අවශ්‍යය පහසුකම් සැළසෙන ආකාරයෙන් එම ඉදිකිරීම් කරන ලෙස දැනුවත් කිරීම සිදුකර තිබෙන බවත් ආණ්ඩුකාර ලලිත් යූ ගමගේ මහතා කීය.
මධ්‍යම පළාතේ රාජ්‍ය සේවකියින් 1000 කට සංඥා භාෂා අවබෝධය ලබා දීමට පියවර ගෙන තිබෙන බව මෙහිදී මධ්‍යම පළාත් ප්‍රධාන ලේකම් ගාමිණී රාජරත්න මහතා පැවසුවේය.
මහනුවර අතිරේක දිස්ත්‍රික් ලේකම් උත්පල ජයරත්න,මහනුවර දිස්ත්‍රික් සමාජ සේවා නිලධාරී චන්දන කල්පගේ,බැරන්ඩිනා ආයතනයේ ව්‍යාපෘති කළමනාකාර අර්ජුණ එරමුදුගොල්ල යන මහත්වරුද මෙහිදී කතා කළහ.

කොළඹ පැවති රෝදපාද චාරිකාව ගෝල්ෆේස් පිටියේ සිට ජනාධිපති ලේකම් කාර්යාලය වෙතට ගමන්ගත් අතර, ලේකම් කාර්යාලයට ඇතුලුවන ප්‍රධාන දොරටුව වෙත පැමිණි ජනාධිපති සම්භන්ධීකරණ ලේකම්වරයෙකු විසින් අදාළ ඉල්ලීම් සහිත සංදේශය භාරගෙන ගනු ලැබිණි. එම සංදේශය ජනාධිපති තුමා වෙත ලබාදෙන බවත් ජානාධීපති ලේකම් කාර්යාලය හරහා අවශ්‍ය අවධානය යොමුකරන බවත් ඔහු දැන්වීය.

එමෙන් ම කොළඹ දිස්ත්‍රික් ලේකමිතුමා වෙත ද සංදේශයක් භාරදුන් අතර, සියලුම දිස්ත්‍රික් ලේකම්වරුන්ගේ සහභාගිත්වයෙන් මේ මස 25 වෙනිදා පැවැත්වීමට නියමිත සමාජසේවා නිළධාරිවරුන්ගේ වැඩසටහනට සහභාගී වී ආබාධ සහිත පුද්ගලයින්ගේ විසඳා ගත යුතු අවශ්‍යතා පිළිබඳව යෝජනාවලියක් ඉදිරිපත් කරන ලෙසට ආරාධනා කළ බව කොළඹ රෝදපාද චාරිකාවේ නියමුවා වන ටිකිරි කුමාර මාධ්‍යට ප්‍රකාශ කළේය.

සියලුම ප්‍රාදේශීය ලේකමි කාර්යාලවල ද ප්‍රවේශ පහසුකම් සහතික කොට රෝදපුටුව සහිත ලංජනය ප්‍රදර්ශනය කරන්න කියා කොළඹ දිස්ත්‍රික් ආබාධ සහිත පුද්ගලයින් විසින් කොළඹ දිස්ත්‍රික් ලේකමිතුමා වෙත සිදුකළ ඉල්ලීමට යහපත් ප්‍රතිචාරයක් ලබාදුන් බව ද ටිකිරි කුමාර පැවසීය.

පහත දැක්වෙන්නේ කුරුණෑගල දී සුරේන්ද්‍ර ඒකනායක මහතා විසින් සිය ඉල්ලීම් සහිත සංදේශය කුරුණෑගල දිස්ත්‍රික් ලේකම් ආර් .එම් ආර් .රත්නායක මහතා වෙත ලබා දුන් අයුරුයි .